Preocupaus per o caso GARA

No son pocos os problemas y retos, tecnolochicos y humans, que o periodismo enfrontina en estos tiempos de revolquines.

As y os periodistas habríanos de fer-nos-ne per a propagación d'as «fake news», noticias falsas que existen dende siempre pero se esparden como nunca. Habría de sacar-nos o suenio a crisi de credibilidat y lechitimidat que sufren los meyos de comunicación. Habríanos de poder dedicar tiempo y esfuerzo a prestichiar-los, a explicar que, afortunadament, os y as periodistas pensamos de formas muito diversas, pero que dezaga de cada noticia que un profesional de l'oficio compone existe un esfuerzo honesto per retratar una realidat poliedrica que siempre tendrá diversas anvistas. Somos conscients que i hai excepcions y istas son unatra fuent de preocupación.

Os y as periodistas habríanos d'estar mas que preocupaus per os 94 companyers y companyeras muertas en 2018 en tot lo globo mientres exerceban a profesión. Sobre tot parando cuenta que as enrestidas a periodistas gosan estar, amás, un indicador de violacions de dreitos grieus y cheneralizadas contra la población civil.

Tamién habrían d'alarmar-nos los mas de 10.000 puestos de treballo perdius en o sector entre a zaguera crisi economica, nomás en o Estau espanyol. Nos habría d'ocupar una precariedat estructural que a ormino fa imposible conciliar l'oficio con un prochecto de vida a largo plazo.

Nos habrían de preocupar istos temas y muitos mas, y efectivament nos preocupan. Amamos iste oficio y asumimos como propios totz os retos que tiene plantiaus. Son os nuestros, con ells sellamos o nuestro compromiso con a sociedat do vivimos.

Lo que no habría d'estar obchecto de preocupación en pleno 2019 ye o risgo de fallita d'un periodico como conseqüencia d'una persecución chudicial que s'ha prolargau entre dos decenios. “Egin” estió zarrau de traza ilegal en 1998, seguntes lo reconoixió anyos dimpués dica lo Tribunal Supremo. Consideramos que endosar agora la suya deuda con a Seguridat Social a GARA ye absurdo y castiga inchustificadament a ixe meyo y a los suyos treballadors.

Per ixo queremos solidarizar-nos con os nuestros companyers y companyeras de GARA. Queremos desfender lo suyo dreito a fer periodismo sin mas obstaculos que los ya mencionaus. Queremos emparar la libertat de prensa y la pluralidat. As y os periodistas tenemos prous problemas presents y retos futuros como pa haber d'estar preocupaus per pantasmas d'o pasau.

Sinyaturas

  • John Carlin
  • Eider Hurtado
  • Carmen Lira
  • Xabier Lapitz
  • Ferran Casas
  • Vicent Partal
  • Vicent Sanchís
  • Javier Gallego
  • Nerea Azurmendi
  • Maite Artola
  • Edu Barinaga
  • Monica Terribas
  • David Fernàndez
  • Roger Palà
  • Karlos Zurutuza
  • Antton Rouget
  • Martxelo Otamendi
  • Joseba Santamaria
  • Ana Pardo de Vera
  • Ane Irazabal
  • Luis Aizpeolea
  • Odile Kruzeta
  • Javier Salutregi
  • Mirentxu Purroy
  • Mariano Ferrer
  • Dani Alvarez
  • Jorge Nagore
  • Antoni Bassas
  • Neus Tomàs
  • Alberto Moyano
  • Jordi Basté
  • Grup de Periodistes Ramon Barnils